Header AD

Perfil badak José Neves Samala-Rua

Perfil badak Jose Neves Samala-RuaJere radiu FM Matebian nebe halo transmisaun movel kampana pro-independensia iha Dili no Bobonaru. Organiza estabelesimentu Presidium Juventude Loriku Aswain nebe hamahon organizasaun juventude klandestina lobuk ida molok realiza referendum. Team leader Ekipa-11 CNRT (Conselho Nacional da Resistência Timorense) ba kampana pro-independensia iha distritu Oekusi, Bobonaru, Ermera no Likisa, fulan Agostu 1999, molok referendum.

Koordenador programas RENETIL ba edukasaun sivika, monitorizasaun kampane partidus politikus no eleisaun Assembleia Constituinte no Assembly Watch, iha 2001 no 2002. Eleitu ba Sekretariu Jeral RENETIL durante periode rua tuir malu husi 2004 too 2008 no 2008 too 2012, maibe resigna-an iha Maiu 2010 hodi asume kargu Komisariu Adjuntu Komisaun Anti- Korrupsaun (KAK).

Nudar Sekretariu Jeral RENETIL reativa fila fali Buletin Neon Metin no Radiu Loriku Lian, organiza programa Parliament Watch no programa prevensaun no rezolusaun konflitu.

Servisu iha NGO Timor-Aid (1999-2000), konsultor ba UNDP (2001 no 2003) no JICA (2003), relator seksaun “detensaun entre 1976 too 1979” CAVR (Maiu-Junu 2004) iha Ministeriu Edukasaun, Diresaun Juventude no Desportu (2004-2006), iha Sekretaria Estadu Juventude no Desportu (2006-Marsu 2010) no iha Komisaun Anti-Korrupsaun (KAK) husi Abril 2010 too Junu 2016.

José António de Jesus das Neves alias Samala-Rua, oan husi Pascoal das Neves no Maria Carlota Santa Florindo hamutuk ho bin-alin sanulu. Husi Uma Lisan Rae-Pusa. Moris iha 15 Junu tinan 1962, iha Poetete, Ermera, kaben-nain no hetan “Samala-Rua” junior ida.

Jose Neves Samala-Rua nia perfil badakKomisariu Adjuntu KAK (Komisaun Anti-Korrupsaun) husi 2010 too Junu 2016, kaer asuntu sensibilizasaun anti-korrupsaun ba publiku, iha setor edukasional, sosiedade sivil, asosiasaun, lideres komunitariu no peskiza, ikus liu iha 2015 too 2016 responsabilza mos servisu prevensaun iha setor publiku no privadu.

Jestor projetu “Leadership Capacity Building for Economic Development” (LED), iha Ministeriu Edukasaun, Kultura, Juventude no Desportu ho fundu husi Banku Mundial iha 2004 too 2007 nebe tulun harii Konsellu Juventude iha Distritu, apoia inisitivas husi grupu foinsa’e sira no fo formasaun sidadania sivika, jestaun projetu no lideransa ba joven sira. Servisu hamutuk ho UNICEF, ba halo survey nasional juventude iha 2005 hodi dezenvolve politika nasional juventude no halo diskusaun no estudus ba harii Parlamentu Foinsa’e Timor-Leste nian.

Asesor ba Sekretariu Estadu Juventude no Desportu Miguel Manetelu husi Outubru 2007 too Marsu 2010 nebe integra atividades projetu nian sira hanesan politika nasional juventude Timor-Leste, Publikasaun Mensal Lian Foinsa’e, estabelese Parlamentu Foinsa’e no programa interkambiu juventude iha Sekretaria Estadu Juventude no Desportu (SEJD).

Mestradu iha Edukasaun no Dezenvolvimentu, husi East Anglia University, Norwich, Inglaterra, iha 2003, ho balsa estudus husi Governu Britaniku. Kursu fulan 3 kona ba demokrasia iha Centro de Estudos ba Seguransa no Diplomasia iha Birmingham University iha tinan 2009, hetan bolsas husi Australian Leadership Award, Australia iha Victoria University, Melbourne durante fulan tolu ho asuntu espesifika kona ba politika juventude.

History of Jose Neves Samala-Rua

Akaba 4a klase iha 1975 no pre-sekundariu, tempu Indonezia, iha 1982. Tama Seminariu Menor Nossa Senhora de Fátima, Lahane iha 1982 no kontinua estudos iha Seminariu Maior Diosezanu Giovani, Malang, Indonesia iha 1986 too 1992. Iha 1989 too 1990 halo estágiu iha Seminariu Menor Lahane, nudar Vise-Prefeitu no hanorin Latin, psikologia personalidade no introdusaun Biblia ba seminarista sira. Fila fali ba Seminariu Maior, Malang iha tinan 1990.Husik Seminariu Maior iha Jullu 1991 no remata estudos filozofia no teolojia iha Sekolah Tinggi Filsafat Teologi Widya Sasana Malang iha 1993.

Halo parte iha movimentu klandestina OJETIL iha Timor-Leste, involve iha preparasaun no realizasaun manifestasaun hasoru Embassador Estados Unidos America nian iha Janeiru 1990. Sai militante RENETIL no asume funsaun nudar Sekretariu Rejiaun Malang no nudar Prezidente Comissão Permanente RENETIL, depois La-Sama kapturadu. Asume funsaun ne’e hodi reorganiza fali estrutura no atividades RENETIL nian iha Indonesia, Timor-Leste no reativa fali komunikasaun ho Frenti Klandestina, Frente Armada, Frente Diplomatika no grupus solidariedade iha tasi balu. Halo parte organiza asaun manifestasaun 12 Junu 1998 iha Ministeriu Negosius Estranjeirus Indonesia nian iha Jakarta no asaun lobuk ida tuir fali.

Kapturadu iha Malang iha 19 Maiu 1994, hafoin detein iha detensaun Polisia territoriu Malang nian, muda ba detensaun Polisia iha Surabaya, depois fila fali ba detensaun Malang no ikus muda ba prizaun jeral Lowokwaru Malang. Tama kadeia durante tinan 3 fulan 4, iha prizaun Lowokwaru Malang, Indonesia.

Iha fulan Agostu 1998 hamutuk ho kompaneirus Lucas da Costa Rama-Metan, Joaquim Fonseca Russuo no Demétrio Amaral-Sakunar halo visita ba Finlandia, ho apoiu husi Komite 100 Finlandia hodi hatoo asuntu lobuk ida relasiona auto-determinasaun, meiu ambiente, ekonomiku no politiku no edukasaun ba Governo, membrus Parlamentu no sosiedade sivil Finlandia nian. Partisipa iha Jornada de Timor-Leste iha Lisboa, iha 1998 nebe professor Barbedo Magalhães koordena.


Konteudu:
Perfil [1]: Ema Baibain
Perfil [2]: Konflitu Politiku Interrompe Estudu
Perfil [3]: Edukasaun Nivel Pre-Sekundariu
Perfil [4]: Seminariu, Sensibilizasaun no Patriotismu
Perfil [5]: Haklaken Situasaun Timor-Leste iha Komunidade Foun
Perfil [6]: Estajiu no Movimentu Klandestinu
Perfil [7]: Masakre Santa Kruz, Desmantelamentu no Reorganizasaun Rede Klandestina RENETIL
Perfil [8]: Samala-Rua Kapturadu
Perfil [9]: Asaun iha Jakarta no Tasi-Balu
Perfil [10]: Buka Osan ba Moris no Atividade Klandestina
Perfil [11]: Fila mai Timor-Leste
Perfil [12]: Involvimentu iha Pre no Post Restaurasaun Independensia
Perfil [13]: Kursu Mestradu no Kursu Seluk
Perfil [14]:Kaer Knaar iha Komisaun Anti-Korrupsaun (KAK)
Perfil [15]:Husi KAK, Kandidatu ba Prezidenti Republika 2017-2022
Perfil badak José Neves Samala-Rua Perfil badak José Neves Samala-Rua Reviewed by José Neves Samala-Rua on 6:36 AM Rating: 5